Dezanove asociacións ferrolás presentan unha proposta para dar nova vida ao edificio de suboficiais de Canido

Voces de Ferrol - RadioVoz

A antiga residencia de suboficiais do Exército de Terra de Canido, un edificio tamén coñecido popularmente como «o submarino», podería albergar novos usos se prospera a proposta que o venres presentaron dezanove asociacións vinculadas ao barrio alto. Os seus representantes déronse cita fronte ao emblemático inmoble do ano 1933 cun dobre obxectivo. Por unha banda, para instar ao Concello de Ferrol a incluír nos seus orzamentos do 2025 unha partida para comprar o inmoble ao Ministerio de Defensa, dando cumprimento así a un acordo plenario aprobado por unanimidade o pasado mes de xaneiro, tras a presentación dunha moción de FeC. E por outra banda, presentar o plan de usos para este novo equipamento que elaborou o movemento asociativo e que plasmou nun documento «propositivo e orientador», que está aberto a outras ideas.